Angel One चा Q1 नफा कोसळला, तरीही शेअर वाढला; गुंतवणूकदार गोंधळात

Angel One Q1 Results : १७ जुलै २०२५ — देशातील आघाडीच्या कॅपिटल मार्केट ब्रोकरेज कंपनीपैकी एक असलेल्या Angel One च्या शेअरमध्ये आज सकाळी सौम्य तेजी पाहायला मिळाली. विशेष बाब म्हणजे, कंपनीचा जून तिमाहीतील निव्वळ नफा तब्बल ६१ टक्क्यांनी घसरून ₹११४.४ कोटींवर आला असूनही, गुंतवणूकदारांनी शेअरमध्ये रस कायम ठेवला. सेबीच्या डेरिव्हेटिव्ह (F&O) व्यवहारांवरील कारवाईमुळे कंपनीच्या कमाईवर मोठा परिणाम झाला आहे.

हे पण वाचा : Q1 निकालाआधी Reliance Power चा धडाकेबाज प्लान; गुंतवणूकदारांसाठी संधी की धोका?

ताज्या आकडेवारीनुसार, एंजेल वनच्या एकूण महसुलातही १९ टक्क्यांची घट झाली आहे. गेल्या वर्षी याच तिमाहीत कंपनीचा महसूल ₹१४०५ कोटी होता, तो यंदा फक्त ₹११४० कोटींच्या आसपास राहिला. ऑपरेटिंग लेव्हलवरही कामगिरी कमजोर झाली असून, EBITDA ४१.७% नी घसरून ₹२७४.१ कोटी झाला, तर ऑपरेटिंग मार्जिन देखील ३३.४४% वरून २४.०४% वर आले.

कंपनीने महसूलात घसरण असूनही काही सकारात्मक बाबी नोंदवल्या आहेत. मागील तिमाहीच्या तुलनेत (Q4FY25) महसुलात ८% वाढ झाली आहे. याच काळात एकूण ऑर्डर संख्याही ३४.३ कोटींवर गेली आहे, जी मागील तिमाहीत ३२.७ कोटी होती. यामध्ये F&O ऑर्डर ४.५% नी वाढून २४.१ कोटींवर गेल्या असून, कॅश सेगमेंटमध्ये स्थिरता पाहायला मिळाली.

अर्थातच, एंजेल वनच्या बाजारातील एकूण हिस्सा मात्र कमी झाला आहे. कंपनीचा रिटेल इक्विटी टर्नओव्हरमधील हिस्सा १९.७% वर आला असून, F&O मार्केटमधील हिस्सा २१% वर आला आहे – अनुक्रमे १७ आणि ४७ बेसिस पॉइंट्सनी घट झाली आहे.

या पार्श्वभूमीवरही काही ब्रोकरेज हाउसेसनी कंपनीबाबत सकारात्मक भूमिका घेतली आहे. Motilal Oswal ने नमूद केले की, “Q1 मध्ये सेबीच्या नियमांमुळे प्रथम काही अडथळे होते, मात्र नंतर बाजार स्थिर राहिल्याने व डिलिव्हरी ब्रोकरेजमुळे काही प्रमाणात महसूल वाढीस हातभार लागला.” कंपनीच्या नव्या व्यवसायांपैकी कर्ज वितरण क्षेत्रात उल्लेखनीय गती दिसून आली असून, म्युच्युअल फंड वितरण, वेल्थ मॅनेजमेंट व AMC व्यवसाय लवकरच वेग घेतील, असा विश्वास या ब्रोकरेज संस्थेने व्यक्त केला आहे.

हे पण वाचा : CDSL शेअर पुन्हा तेजीत; मार्केट कॅप 36 हजार कोटी पार, नवीन टार्गेट अपडेट

Investec या आंतरराष्ट्रीय ब्रोकरेजनेही ‘खरेदी’चा सल्ला कायम ठेवत ₹२७०० चे टार्गेट दिले आहे. त्यांचे म्हणणे आहे की, अपेक्षेपेक्षा चांगले निकाल लागले असून, खर्च नियंत्रित राहिल्यामुळे निव्वळ नफ्यात घट असली तरी ती मर्यादित राहिली.