५७० रुपयांचा शेअर थेट ७४० वर! Anthem IPO ने दिला मोठा रिटर्न

Anthem Biosciences IPO Listing : आज जरी शेअर बाजारात घसरणीचं वातावरण असेल, तरी अँथेम बायोसायन्सेस लिमिटेडच्या आयपीओने गुंतवणूकदारांच्या चेहऱ्यावर आनंद फुलवला आहे. पहिल्याच दिवशी या कंपनीच्या शेअर्सची जोरदार एंट्री झाली असून प्रत्येक शेअरवर तब्बल ₹१५३ पर्यंतचा नफा मिळाल्याने गुंतवणूकदार अक्षरशः मालामाल झाले आहेत.

हे पण वाचा : बँकिंग शेअरमध्ये जोरदार तेजी! HDFC बँकेने दिल्या गुंतवणूकदारांना ३ सुखद बातम्या

बीएसईवर अँथेमचा शेअर ७२३.०५ रुपयांवर तर एनएसईवर ७२३.१० रुपयांवर लिस्ट झाला. म्हणजेच ५७० रुपयांच्या इश्यू प्राईसवरून तब्बल २६.८५ टक्क्यांची वाढ, तर कामकाजादरम्यान NSE वर हा शेअर ७४० रुपयांची पातळी गाठून गेला. ही कामगिरी गुंतवणूकदारांच्या अपेक्षेपेक्षा वरची ठरली. ग्रे मार्केटमधून आधीच या लिस्टिंगसाठी सकारात्मक संकेत मिळत होते, ते अगदी खरे ठरले.

विशेष म्हणजे अँथेम बायोसायन्सेसचा हा IPO “ऑफर फॉर सेल” स्वरूपात होता. म्हणजे कंपनीने नवीन शेअर्स इश्यू न करता विद्यमान भागधारकांनीच आपले शेअर्स विकले. त्यामुळे या प्रक्रियेतून कंपनीने थेट निधी उभारलेला नाही, पण मार्केटमधील विश्वास स्पष्टपणे झळकला.

कंपनीनं IPO साठी प्राइस बँड ₹५४० ते ₹५७० ठेवला होता. किरकोळ गुंतवणूकदारांसाठी २६ शेअर्सचा एक लॉट आवश्यक होता. म्हणजेच एका लॉटसाठी ₹१४,८२० इतकी गुंतवणूक लागली. तर कमाल मर्यादा १३ लॉट्स म्हणजेच ३३८ शेअर्स होती, ज्यासाठी जवळपास ₹१.९२ लाखांची गुंतवणूक झाली असती. आता लिस्टिंगनंतर मिळालेला दर पाहता, एका लॉटमागे तब्बल ₹३,९७८ चा फायदा मिळाला आहे.

हे पण वाचा : डिफेन्स शेअरचा धमाका! HAL शेअर देणार 29% परतावा, ग्लोबल ब्रोकिंग फर्मचा पॉझिटिव्ह अलर्ट

अँथेम बायोसायन्सेस ही कंपनी २००६ मध्ये स्थापन झाली. ती फार्मास्युटिकल क्षेत्रात “कॉन्ट्रॅक्ट रिसर्च, डेव्हलपमेंट अँड मॅन्युफॅक्चरिंग ऑर्गनायझेशन (CRDMO)” म्हणून काम करते. अँथेम औषध संशोधनापासून ते उत्पादनापर्यंतची संपूर्ण साखळी एका ठिकाणी पुरवते. ही सेवा ती भारतासह अनेक जागतिक बायोटेक आणि फार्मा कंपन्यांना देते. तिची कामगिरी आणि उत्पादन क्षमतेमुळे गुंतवणूकदारांचा तिच्यावर मोठा विश्वास आहे.

अँथेमच्या दमदार लिस्टिंगने आणखी एक गोष्ट अधोरेखित केली – चांगल्या व्यवसाय मॉडेल आणि बाजारातील विश्वास असल्यास IPO यशस्वी होऊ शकतो, जरी मार्केटमध्ये चढ-उतार असले तरी. अँथेमची ही यशोगाथा आगामी IPO साठीही दिशादर्शक ठरू शकते.