नितीन गडकरींचा मास्टरस्ट्रोक! टोल दरात मोठ्या बदलाची शक्यता, वाहनचालकांना बसणार फटका की दिलासा?
New Toll Rules | देशातील टोल प्रणालीत लवकरच मोठे बदल होण्याची शक्यता आहे. गेल्या काही महिन्यांपासून केंद्रीय रस्ते वाहतूक आणि महामार्ग मंत्रालय (MoRTH) टोल नियमांमध्ये सुधारणा करण्याच्या दिशेने काम करत आहे. यामध्ये खास करून वारंवार टोल भरावा लागणाऱ्या वाहनधारकांना दिलासा देणारे बदल समाविष्ट आहेत. या नव्या योजनेचे उद्दिष्ट टोल व्यवस्थापन सुलभ करणे आणि सामान्य नागरिकांचा आर्थिक भार कमी करणे हे आहे.
मंत्रालयाने सध्या दोन महत्त्वाचे प्रस्ताव तयार केले आहेत आणि ते अर्थ मंत्रालयाकडे पाठवले आहेत. पहिला प्रस्ताव असा आहे की, ज्या राष्ट्रीय महामार्गांवर रस्ता अडीच लेनचा किंवा अरुंद आहे, तिथे टोल पूर्णपणे माफ केला जावा. दुसरा प्रस्ताव असा आहे की, नागरिकांना सुमारे 3,000 रुपयांमध्ये वार्षिक टोल पास उपलब्ध करून दिला जावा. या पासच्या माध्यमातून एकदा ठराविक रक्कम भरल्यानंतर संपूर्ण वर्षभर वाहनचालकांना टोल भरावा लागणार नाही.
वार्षिक पासबाबत विचार-
या प्रस्तावांची अंमलबजावणी झाल्यास देशभरातील लाखो वाहनचालकांना मोठा दिलासा मिळू शकतो. सध्या अनेक रस्त्यांवर वारंवार टोल भरावा लागतो, ज्यामुळे प्रवास खर्च वाढतो. जर हा वार्षिक पास लागू झाला, तर नियमित प्रवास करणाऱ्या नागरिकांसाठी ही योजना आर्थिकदृष्ट्या फायदेशीर ठरेल.
MoRTH ने आधीही अशा टोल पासच्या कल्पना मांडल्या होत्या, ज्यामध्ये आजीवन पास, वार्षिक पास आणि मासिक पास यांचा समावेश होता. मात्र, त्या वेळी मासिक पास स्वीकारण्यात आला होता. आता मात्र वार्षिक पास पुन्हा चर्चेत आला आहे, कारण तो अधिक सोयीचा आणि सुलभ असल्याचे मंत्रालयाचे मत आहे.
वाहनधारकांना मिळणार दिलासा?
हे प्रस्ताव अर्थ मंत्रालयाच्या पुनरावलोकनात आहेत. महसूल घट होणार का, याबाबत विश्लेषण सुरू आहे. अरुंद महामार्गांवरील टोल माफ केल्यास सरकारच्या महसुलावर फारसा परिणाम होणार नाही, असे अधिकाऱ्यांचे म्हणणे आहे. परंतु, वार्षिक पास लागू झाल्यास काही प्रमाणात महसूल घट होण्याची शक्यता आहे.
अद्याप ही योजना नेमकी कधीपासून लागू होणार याबाबत कोणतीही अधिकृत घोषणा झालेली नाही. मात्र, एकदा अर्थ मंत्रालयाची मंजुरी मिळाली की, टोल प्रणालीत मोठा बदल अपेक्षित आहे. वाहनधारकांसाठी ही योजना प्रवास सुलभ करण्यास आणि खर्चात बचत करण्यास निश्चितच मदत करेल.
