पुण्यापेक्षा पिंपरी-चिंचवडमध्ये घरांचे दर असणार आहेत अधिक महाग, रेडीरेकनरच्या दरात वाढ झाल्यामुळे परिणाम

पुणे: पुण्याच्या तुलनेत पिंपरी-चिंचवड महापालिका हद्दीतील रेडीरेकनरच्या दरात अधिक वाढ करण्यात आली आहे. पुण्यात सरासरी ४.१६ टक्के, तर पिंपरी-चिंचवडमध्ये तब्बल ६.६९ टक्के वाढ झाली आहे. त्यामुळे पिंपरी-चिंचवडमधील घरांचे आणि जमिनींचे दर आणखी महाग होणार आहेत.

राज्याच्या नोंदणी आणि मुद्रांक शुल्क विभागाने सोमवारी (१ एप्रिल) पासून नवे रेडीरेकनर दर लागू केले आहेत. मागील काही वर्षांत करोना संकट, निवडणुका आणि आर्थिक घडामोडींच्या पार्श्वभूमीवर या दरांमध्ये मोठा बदल झालेला नव्हता. मात्र, आता या आर्थिक वर्षात दर वाढवण्यात आले आहेत.

रेडीरेकनर दर वाढल्याने पुण्यात घरांच्या किमती वाढण्याची शक्यता आहे. विशेषतः कोरेगाव पार्क, प्रभात रस्ता, भांडारकर रस्ता, विधी महाविद्यालय रस्ता, बोट क्लब, जंगली महाराज रस्ता, कर्वे रस्ता आणि फर्ग्युसन रस्ता या प्राइम लोकेशन्समध्ये दर अधिक वाढण्याची अपेक्षा आहे.

पिंपरी-चिंचवडमध्ये मागील काही वर्षांत मोठ्या प्रमाणावर औद्योगिक कंपन्या, माहिती-तंत्रज्ञान क्षेत्राचा विस्तार आणि रहिवासी संख्येत वाढ झाली आहे. त्यामुळे येथे सदनिकांची मागणी मोठ्या प्रमाणावर वाढली आहे. परिणामी, पुण्याच्या तुलनेत पिंपरी-चिंचवडमध्ये रेडीरेकनरच्या दरात अधिक वाढ झाली आहे.

या दरवाढीमुळे नवीन घर खरेदी करणाऱ्या नागरिकांना अधिक खर्च करावा लागणार आहे. तसेच, स्टॅम्प ड्युटी आणि रजिस्ट्रेशन शुल्कही वाढण्याची शक्यता आहे. त्यामुळे घर खरेदीपूर्वी नवी किंमत आणि खर्चाचा आढावा घेणे गरजेचे ठरणार आहे.