फक्त 3 दिवसात 23% वाढ! ‘ही’ इलेक्ट्रिक बस कंपनी शेअर बाजारात तुफान कमावत आहे

Olectra Greentech Share Price : इलेक्ट्रिक बस आणि पॉवर इन्सुलेटर बनवणाऱ्या ओलेक्ट्रा ग्रीनटेक कंपनीच्या शेअर्सनी मागील तीन दिवसांपासून जोरदार तेजी पकडली असून, गुंतवणूकदारांच्या पोर्टफोलिओमध्ये एकच उत्साह संचारला आहे. गुरुवारी, २४ जुलै रोजी कंपनीचा शेअर तब्बल १६.७८ टक्क्यांनी वाढून १५५० रुपयांवर बंद झाला. व्यवहारादरम्यान तो १५९० रुपयांपर्यंत गेला, ज्यामुळे अनेक गुंतवणूकदारांची लक्षं या शेअरकडे वळली आहेत.

हे पण वाचा : २४ कॅरेट सोनं आज किती रुपयांना? घसरण की वाढ? जाणून घ्या आजचा रेट

गेल्या तीन दिवसांत ओलेक्ट्रा ग्रीनटेकमध्ये एकूण २३ टक्क्यांहून अधिक वाढ झाली आहे. विशेष म्हणजे, फक्त एका महिन्यातच या शेअरने ३३.६७% परतावा दिला असून, यामुळे कंपनीचे बाजारमूल्य १२,६२२ कोटी रुपयांवर पोहोचले आहे.

बीएसईवरील व्यवहारांची आकडेवारी बघितल्यास, गुरुवारी १८.८२ लाख शेअर्सची उलाढाल झाली, जी गेल्या दोन आठवड्यांच्या सरासरीपेक्षा अनेक पटीने अधिक आहे. यामधून २७८.९७ कोटी रुपयांचा एकूण व्यवहार झाला आहे, जे शेअरबाजारातील मोठ्या हालचालींचं द्योतक ठरतं.

टेक्निकल चार्ट्सनुसार, ओलेक्ट्रा ग्रीनटेकच्या शेअर्समध्ये सध्या जबरदस्त तेजीचे संकेत दिसत आहेत. हा शेअर ५ दिवसांपासून ते २०० दिवसांपर्यंतच्या सर्व सिंपल मूव्हिंग अ‍ॅव्हरेजेस (SMA) च्या वर आहे. मात्र, काही विश्लेषक या तेजीला थोडीशी सावधगिरीची नोंदही देत आहेत.

RSI (Relative Strength Index) ८२.२० या पातळीवर आहे, जे ओव्हरबॉट झोन दर्शवतं. म्हणजेच, शेअर खरेदीची स्पर्धा इतकी वाढली आहे की नजीकच्या काळात किंमत स्थिर राहू शकते किंवा काहीसा नफा वसूल करण्याचा दबाव येऊ शकतो. काही तज्ज्ञांनी शेअर लवकरच १६०० रुपयांपर्यंत जाऊ शकतो असं सांगितलं आहे, तर काहीजणांनी १५५० रुपयांवर तीव्र रेझिस्टन्स असल्याचे मत मांडले आहे.

हे पण वाचा : 25 जुलैला ‘या’ जिल्ह्यांमध्ये पावसाचा कहर! रेड अलर्ट जाहीर

कंपनीच्या आर्थिक बाबींवर नजर टाकल्यास, सध्याचा P/E रेशो ८८.०९, P/B व्हॅल्यू १२.४८, आणि EPS १७ रुपये आहे. कंपनीचा RoE १४.१७% असून, बीटा १.४ दर्शवतो की या शेअरमध्ये किंमतीच्या बाबतीत बरीच अस्थिरता आहे.

ओलेक्ट्रा ग्रीनटेक कंपनी ही मेघा इंजिनिअरिंग अँड इन्फ्रास्ट्रक्चर्स लिमिटेडची उपकंपनी आहे. ही कंपनी इलेक्ट्रिक बस तयार करणाऱ्या भारतातील आघाडीच्या कंपन्यांपैकी एक असून, सध्या देशभरात इलेक्ट्रिक मोबिलिटीबाबत असलेली सकारात्मकता यांच्याच फायद्याची ठरत आहे. शिवाय, पॉवर ट्रान्समिशनसाठी इन्सुलेटर उत्पादन क्षेत्रातही कंपनीचा मोठा वाटा आहे.