पुण्याच्या मानाच्या गणपतीसाठी मोठी बातमी! मंदिर संवर्धनासाठी ४० लाखांचा निधी

Kasba Ganpati Temple Restoration : शहराचे ग्रामदैवत आणि मानाचा पहिला गणपती म्हणून ओळखले जाणारे श्री कसबा गणपती मंदिर आता नव्या रूपात अधिक भव्य आणि सुरक्षित होणार आहे. ऐतिहासिक आणि धार्मिकदृष्ट्या अत्यंत महत्त्वाच्या असलेल्या या मंदिराच्या जतन व संवर्धनासाठी ४० लाख रुपयांचा निधी मंजूर करण्यात आला आहे. खास बाब म्हणजे, या कामासाठी भाजपचे कसबा मतदारसंघाचे आमदार हेमंत रासने यांनी केलेल्या सातत्यपूर्ण पाठपुराव्याला अखेर यश मिळाले आहे.

हे पण वाचा : हे पण वाचा : पुणेकरांसाठी दिलासादायक बातमी! पुण्याला पाणी देणारी चारही धरणं भरभरून भरली

जिल्हा नियोजन समितीच्या माध्यमातून मंजूर झालेल्या या निधीतून मंदिराच्या पहिल्या मजल्याच्या जतन व दुरुस्तीची कामे हाती घेण्यात आली आहेत. रविवारी या कामाचा औपचारिक शुभारंभ करण्यात आला. यावेळी श्री कसबा गणपती ट्रस्टचे अध्यक्ष विनायक ठकार, विश्वस्त संगीता ठकार, चतुर्थी मंडळाचे अध्यक्ष श्रीरंग होनप, तसेच सुनील पारखी, सुहास कुलकर्णी, अमित कंक, छगन बुलाखे आणि प्रशांत सुर्वे आदी मान्यवर उपस्थित होते.

छत्रपती शिवाजी महाराजांच्या काळापासून मानाचा पहिला गणपती म्हणून श्री कसबा गणपतीला विशेष महत्त्व आहे. पुण्याच्या सार्वजनिक गणेशोत्सवाची परंपरा इथूनच सुरू झाली, अशी ऐतिहासिक नोंद आहे. त्यामुळे या मंदिराचे जतन केवळ वास्तूच्या दृष्टीने नव्हे, तर सांस्कृतिक वारशाच्या दृष्टिकोनातूनही अत्यंत आवश्यक होते.

आमदार रासने यांनी या निधीसाठी गेल्या अनेक महिन्यांपासून प्रयत्न सुरू ठेवले होते. स्थानिक स्तरावर सादरीकरण, समिती बैठकीत ठोस प्रस्ताव मांडणे आणि शासनस्तरावर पाठपुरावा करणे अशा अनेक टप्प्यांतून हे प्रयत्न त्यांनी यशस्वीपणे पूर्ण केले. या निधीच्या साहाय्याने मंदिराचा पहिला मजला मजबुतीकरण, गळक्या छपरांची दुरुस्ती, पावसाळ्यातील पाणी साचण्याची समस्या दूर करणे, तसेच ऐतिहासिक रचना कायम ठेवून आवश्यक आधुनिकिकरण अशा प्रकारची कामे केली जाणार आहेत.

हे पण वाचा : शुभमन गिलच्या Nike जर्सीमुळे BCCIला आर्थिक फटका? 300 कोटींच्या करारावरून वाद

या संदर्भात बोलताना आमदार रासने म्हणाले, “कसबा गणपती हे पुण्याचं धार्मिक आणि ऐतिहासिक भूषण आहे. त्याचे संवर्धन हे प्रत्येक पुणेकराचे कर्तव्य आहे. हे काम म्हणजे केवळ एक बांधकाम नव्हे, तर आपल्या संस्कृतीचे संरक्षण आहे. हा वारसा पुढील पिढ्यांपर्यंत जसा आहे तसाच पोहोचावा यासाठी हा निधी अत्यंत उपयुक्त ठरेल.”

पुण्याच्या मध्यवर्ती भागात वसलेले हे मंदिर वर्षभर भाविकांच्या दर्शनासाठी खुले असते. गणेशोत्सवात तर येथे लाखोंचा जनसागर उसळतो. अशा ठिकाणी सुसज्ज सुविधा असणे आणि वास्तूची सुरक्षितता कायम ठेवणे ही काळाची गरज बनली आहे. आता या निधीमुळे मंदिराच्या जतनाच्या दिशेने एक महत्त्वाचे पाऊल उचलले गेले आहे.