सेन्सेक्स 327 अंकांनी उसळला, झोमॅटो सुसाट; गुंतवणूकदारांसाठी आजचा दिवस फायदेशीर?

Sensex Today Live : मंगळवारी भारतीय शेअर बाजारात व्यवहाराची सुरुवात प्रचंड उत्साही वातावरणात झाली. सकाळच्या सत्रात सेन्सेक्सने 327 अंकांची दमदार उसळी घेत 82,527 वर पोहोचत व्यापार सुरू केला, तर निफ्टीनेही 76 अंकांची भर घालत 25,166 चा टप्पा गाठला. याच वेळी बँक निफ्टीने 301 अंकांची वाढ नोंदवत 57,253 वर स्थान मिळवलं. या सकारात्मक घडामोडींनी गुंतवणूकदारांचा आत्मविश्वास वाढवला असून, बाजारात उत्साहाचं वातावरण निर्माण झालं आहे.

व्यवहाराच्या पहिल्याच तासात झोमॅटो आणि ईटरनल या कंपन्यांनी गुंतवणूकदारांच्या नजरा खेचल्या. विशेषतः ईटरनलच्या शेअर्समध्ये तब्बल 10 टक्क्यांची उसळी दिसून आली. यामुळे या स्टॉकमध्ये मोठ्या प्रमाणावर खरेदी झाली. याच वेळी चलन बाजारात रुपया आठ पैशांनी घसरून 86.26 या दराने डॉलरच्या तुलनेत उघडला, ज्यामुळे आंतरराष्ट्रीय परिस्थितीचा दबाव काहीसा जाणवला.

बाजारातील क्षेत्रीय चढउतारांवर नजर टाकल्यास मेटल, बँकिंग आणि रिअल इस्टेट या क्षेत्रांनी चांगला वेग घेतला असून, खरेदीचा जोर कायम आहे. मात्र ऑटोमोबाईल, आयटी आणि फार्मासारख्या क्षेत्रांमध्ये थोडीशी कमजोरी दिसून आली. तरीही एकूणच बाजारातील भावना सकारात्मक राहिल्याचं चित्र आहे.

हे पण वाचा : रिलायन्सचा इतिहासातला सर्वात मोठा नफा, तरी शेअर्स पडले? वाचा नेमकं कारण काय?

विदेशी गुंतवणूकदारांच्या हालचालींमध्ये काहीसा बदल दिसून आला. अलीकडच्या तुलनेत आज केवळ 1,400 कोटी रुपयांची विक्री झाली, जी नुकत्याच काळातील सर्वात कमी विक्री ठरली आहे. त्याउलट देशांतर्गत संस्थात्मक गुंतवणूकदारांनी 3,600 कोटी रुपयांची मजबूत खरेदी करून बाजाराला मोठा आधार दिला. यामुळे स्थानिक गुंतवणूकदारांमध्ये अधिक आत्मविश्वास निर्माण झाला आहे.

आजच्या व्यवहारात काही शेअर्सने लक्ष वेधून घेतलं. टाटा स्टील, ट्रेंट, टायटन आणि बीईएल हे शेअर्स वधारले, तर सन फार्मा, इन्फोसिस, बजाज फायनान्स, टाटा मोटर्स आणि बजाज फिनसर्व्ह हे शेअर्स थोडेसे घसरले. याच दरम्यान टायटन कंपनीने दुबईतील प्रसिद्ध Damas LLC मध्ये 67 टक्के हिस्सेदारी विकत घेण्यासाठी 2,440 कोटी रुपयांचा मोठा करार जाहीर केला. हा करार त्यांच्या आंतरराष्ट्रीय विस्ताराला गती देणारा ठरणार आहे.

जागतिक पातळीवरही काही सकारात्मक संकेत मिळाले आहेत. Nasdaq सलग सहाव्या दिवशी वाढला असून S&P 500 ने नवा विक्रम केला आहे. Dow Jones मात्र किरकोळ घसरणीसह बंद झाला. गिफ्ट निफ्टीमध्येही 60 अंकांची वाढ झाली असून, Nikkei आणि Dow Futures मध्येही तेजी दिसून आली. त्यामुळे जागतिक बाजाराच्या अनुकूल परिस्थितीचा फायदा भारतीय बाजाराला स्पष्टपणे मिळताना दिसतो आहे.

दरम्यान भारत आणि अमेरिकेतील व्यापार करारासंदर्भातील वाटाघाटी फिलहाल स्थगित झाल्या आहेत. सहावा टप्पा आता ऑगस्टमध्ये भारतातच होणार असून, कृषी आयात, डिजिटल व्यापार आणि सवलतींसंदर्भात सविस्तर चर्चा होणार आहे. या घडामोडींचाही अप्रत्यक्ष परिणाम शेअर बाजाराच्या सध्याच्या चढ-उतारांवर होत असल्याचं जाणकार सांगतात.

हे पण वाचा : ५७० रुपयांचा शेअर थेट ७४० वर! Anthem IPO ने दिला मोठा रिटर्न

तिमाही निकालांच्या पार्श्वभूमीवरही बाजाराचे लक्ष काही विशिष्ट कंपन्यांकडे वळले आहे. आज Paytm, Dixon Tech, KEI Industries, MGL आणि IRFC यांचे निकाल अपेक्षित असून, त्यानुसार संबंधित स्टॉक्समध्ये अधिक चैतन्य दिसून येण्याची शक्यता आहे.