एक चूक आणि थेट मृत्यूच्या दारात…’हे’ आहेत जगातील सर्वात धोकादायक रोड! गाडी चालवणं काय, साधं पायी चालायलाही पाय थरतर कापतील

रस्ते हे आपल्या दैनंदिन जीवनाचा अविभाज्य भाग आहेत. आपण दररोज शेकडो किलोमीटरचे प्रवास आरामात करत असतो आणि त्यात आपल्याला सुरक्षिततेची खात्री असते. पण जगात काही असेही रस्ते आहेत जिथे पाय ठेवताना देखील धडधड वाढते. हे रस्ते केवळ त्यांच्या भौगोलिक रचनेमुळेच नव्हे, तर हवामान, दरोडे आणि अपघातांच्या भीतीमुळेही धोकादायक मानले जातात. चला तर मग जाणून घेऊया जगातील अशाच काही रस्त्यांबद्दल, जे अक्षरश: जीवाशी खेळणारे ठरू शकतात.

डेथ रोड

सर्वात आधी उल्लेख करावा लागेल तो बोलिव्हियातील डेथ रोडचा. या रस्त्याचं नाव ऐकताच शरीरात एक थरार उठतो. या अरुंद, धुक्याने भरलेल्या आणि अनेक वळणांनी भरलेल्या रस्त्याने प्रवास करणं म्हणजे जणू मृत्यूच्या दाराशी खेळ खेळणं. दरवर्षी 200 ते 300 लोक या मार्गावर जीव गमावतात. रस्त्याच्या एका बाजूला खोल दरी आणि दुसऱ्या बाजूला खडक आहेत, अशा अवस्थेत जर चालकाने जरा गाफीलपणा दाखवला, तर वाहन थेट दरीत कोसळू शकतं.

झोजी ला पास

भारताचाही यात सहभाग आहे. झोजी ला पास, जो काश्मीर आणि लडाखला जोडणारा एक अत्यंत उंचावरचा रस्ता आहे, तोही अतिधोकादायक मानला जातो. समुद्रसपाटीपासून जवळपास 3,500 मीटर उंचीवर वसलेला हा रस्ता हिवाळ्यात बर्फामुळे बंद पडतो. येथे प्रवास करताना सतत बर्फवृष्टी, घसरट रस्ते आणि तीव्र वळणं ही मोठी संकटं ठरतात. इथे अनुभव नसलेल्या चालकांसाठी हा रस्ता एखाद्या दुर्दैवी कहाणीचा आरंभ ठरू शकतो.

काबूल ते जलालाबाद रोड

काबूल ते जलालाबाद हा अफगाणिस्तानातील रस्ता फक्त भौगोलिक दृष्टिकोनातूनच नव्हे, तर सामाजिक असुरक्षिततेमुळेही धोकादायक ठरतो. 143 किमीचा हा प्रवास अतिशय अरुंद रस्त्यांमधून आणि डोंगराळ भागातून जातो. इथे अपघातांची प्रमुख कारणं म्हणजे ओव्हरटेक करताना होणारी चूक आणि वेगावर नियंत्रण न ठेवणं. शिवाय, अफगाणिस्तानमधील अस्थिर परिस्थिती ही या रस्त्याच्या धोकादायकतेत भर घालते.

तुर्कीतील D915 हायवे

तुर्कीतील D915 हायवे हाही अशाच प्रकारे धडकी भरवणारा रस्ता आहे. या रस्त्याच्या एका बाजूला खडकाळ डोंगर असून दुसऱ्या बाजूला खोल दरी आहे. विशेष म्हणजे इथे कुठेही रेलिंग नाही, त्यामुळे वाहन चालवताना प्रत्येक क्षण हा काळजाचा ठोका चुकवणारा असतो. ड्रायव्हरने जर एक चूक केली, तर त्याचे परिणाम प्राणघातक ठरू शकतात.

लक्सर ते हुरघाडा रस्ता

शेवटी येतो इजिप्तमधील लक्सर ते हुरघाडा रस्ता. इथे धोक्याचं स्वरूप वेगळं आहे. या रस्त्याच्या बाजूला असुरक्षितता इतकी आहे की दरोडे, अपहरण आणि हिंसाचाराचे प्रकार घडत असतात. दहशतवादी गटांच्या हालचालीही इथे पाहायला मिळतात, त्यामुळे या मार्गावर प्रवास करणं म्हणजे एक जोखीम पत्करणं.