पुण्यासह ‘या’ ठिकाणी मुसळधार पावसाचा धोका; हवामान खात्याकडून ऑरेंज अलर्ट जारी

Maharashtra Rain Alert : महाराष्ट्रात पुन्हा एकदा मान्सून जोर धरू लागला असून, हवामान विभागाने आगामी पाच दिवसांसाठी राज्यातील अनेक भागांमध्ये मुसळधार पावसाचा इशारा दिला आहे. विशेषतः घाटमाथ्याच्या भागांमध्ये जोरदार पावसाचा धोका लक्षात घेता पुणे, सातारा, रायगड, रत्नागिरी, अमरावतीसह ११ जिल्ह्यांना ऑरेंज अलर्ट देण्यात आला आहे. कोकण, मराठवाडा, विदर्भ, पश्चिम व उत्तर महाराष्ट्रातही पावसाचा यलो अलर्ट देण्यात आला असून नागरिकांना सतर्क राहण्याचे आवाहन करण्यात आले आहे.

हे पण वाचा : केंद्रीय कर्मचाऱ्यांसाठी खुशखबर! पगारात वाढ होणार; केंद्र सरकार 4% महागाई भत्ता वाढवणार

राज्यात गेल्या काही दिवसांपासून पावसाचे स्वरूप अनियमित होते. काही जिल्ह्यांमध्ये पावसाने विश्रांती घेतली असताना काही ठिकाणी जोरदार सरी कोसळत आहेत. मात्र आता हवामान विभागाच्या अंदाजानुसार, ७ जुलैपासून पुढील पाच दिवस राज्यात मोठा पाऊस होणार आहे. परिणामी शेतकरी, पर्यटक, प्रशासन आणि सामान्य नागरिकांसाठी ही महत्त्वाची सूचना आहे.

घाटमाथ्यावर मुसळधार पावसाची शक्यता
पुणे, सातारा, कोल्हापूर या जिल्ह्यांतील सह्याद्री घाटमाथ्याच्या भागांमध्ये मुसळधार पावसाची शक्यता वर्तवण्यात आली आहे. त्यामुळे पुणे-सातारा जिल्ह्यांना ऑरेंज अलर्ट देण्यात आला असून कोल्हापुरात यलो अलर्ट जारी झाला आहे. या भागांमध्ये दरड कोसळण्याचा संभाव्य धोका लक्षात घेऊन प्रशासन सज्ज आहे.

कोकणातही पावसाचा जोर
ठाणे, पालघर, सिंधुदुर्ग जिल्ह्यांत जोरदार सरी पडण्याची शक्यता आहे. रायगड आणि रत्नागिरीसारख्या किनारपट्टीच्या जिल्ह्यांना ऑरेंज अलर्ट देण्यात आला आहे. मुंबईत देखील काही भागांत मुसळधार पावसाची शक्यता असून शहरातील वाहतूक व्यवस्थेवर त्याचा परिणाम होऊ शकतो.

मराठवाडा आणि विदर्भात अलर्टची घंटा
मराठवाड्याच्या जालना, परभणी, हिंगोली आणि नांदेड जिल्ह्यांत पावसाचा जोर राहणार असून यलो अलर्ट जारी करण्यात आला आहे. बीड, लातूर, धाराशिव येथे वादळी वाऱ्यासह हलक्या ते मध्यम स्वरूपाचा पाऊस होणार आहे.
विदर्भात अमरावती, नागपूर, चंद्रपूर, गोंदिया, गडचिरोली आदी जिल्ह्यांमध्ये पावसाचा ऑरेंज अलर्ट आहे, तर अकोला व यवतमाळसाठी यलो अलर्ट जारी झाला आहे.

उत्तर महाराष्ट्रातही पावसाची शक्यता
नंदुरबार, धुळे, नाशिक आणि जळगाव जिल्ह्यांत विजांच्या कडकडाटासह पावसाचा इशारा देण्यात आला आहे. नाशिक आणि नव्याने स्थापन झालेल्या अहिल्यानगर जिल्ह्यात हलक्याशा पावसाच्या सरी पडतील, असा अंदाज आहे.

हे पण वाचा : 6 लाख भारतीयांनी खरेदी केली ही इलेक्ट्रिक स्कूटर! फीचर्स पाहून तुम्हीही थक्क व्हाल

राज्यभरात सध्या खरीप हंगाम सुरु असून पावसाच्या या वाढत्या सत्रामुळे शेतकऱ्यांचे लक्ष आता आकाशाकडे लागले आहे. ज्या भागात अद्याप समाधानकारक पाऊस झाला नाही, त्या ठिकाणी आता खरीप पेरण्यांना वेग मिळण्याची शक्यता आहे. मात्र जिथे आधीच पाणी साचले आहे, तिथे अतिवृष्टी नुकसानकारक ठरू शकते.