दुसरी ते आठवीच्या विद्यार्थ्यांनो, तयारीला लागा! पहिल्या चाचणीचं वेळापत्रक जाहीर

Maharashtra School Exams 2025 : राज्यातील शाळांमध्ये शिक्षण घेत असलेल्या दुसरी ते आठवीच्या विद्यार्थ्यांसाठी एक महत्त्वाची आणि दिशादर्शक बातमी समोर आली आहे. महाराष्ट्र शैक्षणिक संशोधन आणि प्रशिक्षण परिषद (SCERT) यांनी नवीन शैक्षणिक वर्षात होणाऱ्या मूल्यांकन चाचण्यांचं वेळापत्रक जाहीर केलं आहे. यंदा विद्यार्थ्यांना पारंपरिक पद्धतीने वर्षातून एक परीक्षा न देता, थेट तीन टप्प्यांत लेखी आणि तोंडी अशा दोन्ही स्वरूपात मूल्यांकन चाचण्या द्याव्या लागणार आहेत. त्यामुळे विद्यार्थ्यांसाठी आणि शिक्षकांसाठी आता नियोजनबद्ध अभ्यासाचा काळ सुरू झाला आहे.

हे पण वाचा : रेल्वेत तब्बल 1 लाख जागांसाठी मेगाभरती! तरुणांनो सरकारी नोकरीची मोठी संधी चालून आली; वाचा अर्ज कसा करावा?

पहिली चाचणी येत्या ६ ऑगस्टपासून सुरू होत असून, त्यासाठी राज्यभरातील सर्व शासकीय, अनुदानित आणि स्थानिक स्वराज्य संस्थांच्या शाळांमध्ये एकसमान वेळापत्रक लागू करण्यात आलं आहे. SCERT ने जारी केलेल्या नियोजनानुसार, ६ ऑगस्ट रोजी प्रथम भाषेचा पेपर, ७ ऑगस्ट रोजी गणिताची परीक्षा आणि ८ ऑगस्ट रोजी तृतीय भाषा म्हणजे इंग्रजीचा पेपर होणार आहे. विशेष म्हणजे या सर्व चाचण्या केवळ लेखीच नाहीत, तर त्याच दिवशी संबंधित विषयांची तोंडी परीक्षा घेण्याचेही निर्देश दिले आहेत. मात्र, काही शाळांमध्ये विद्यार्थ्यांची संख्या जास्त असल्यास, त्यांना दुसऱ्या दिवशी तोंडी चाचणी घेण्याची मुभा दिली गेली आहे.

प्रश्नपत्रिका वितरणाचं काम १४ ते २८ जुलै २०२५ या कालावधीत पूर्ण होणार आहे. राज्यातील सर्व शाळांना या दरम्यान आवश्यक त्या प्रश्नपत्रिका पोहोचवण्यात येणार असून, परीक्षा शाळेच्या वेळेनुसार सकाळी किंवा दुपारी आयोजित करता येतील. वेळापत्रकात कोणताही बदल करायचा असल्यास संबंधित शाळांनी SCERT कडून अधिकृत परवानगी घ्यावी लागेल.

हे पण वाचा : धक्कादायक बातमी! कपिल शर्माच्या कॅफेवर गोळीबार; खलिस्तानी दहशतवाद्याचा कट?

यंदा संपूर्ण शैक्षणिक वर्षात तीन टप्प्यांत मूल्यांकन चाचण्या होणार आहेत. पहिली चाचणी ऑगस्टमध्ये, दुसरी चाचणी ऑक्टोबरच्या शेवटच्या आठवड्यापासून नोव्हेंबरच्या पहिल्या आठवड्यापर्यंत, तर अंतिम तिसरी चाचणी एप्रिल २०२६ मध्ये घेण्यात येणार आहे. हे वेळापत्रक केवळ मराठी माध्यमापुरतं मर्यादित नसून, इंग्रजी, उर्दू, हिंदी अशा एकूण दहा माध्यमांतील विद्यार्थ्यांसाठी लागू असणार आहे.

या नव्या धोरणामुळे विद्यार्थ्यांमध्ये सातत्याने अभ्यास करण्याची सवय लागेल, तर शिक्षकांना विद्यार्थ्यांच्या प्रगतीचं अचूक मूल्यमापन करता येईल. परीक्षेचा बोजा वाटण्याऐवजी, ती शिक्षण प्रक्रियेचाच एक भाग म्हणून स्वीकारण्याची दिशा यामधून स्पष्टपणे दिसून येते.